Décret royal
Charles, par la grâce de Dieu, roi de France, à tous ceux qui ces présentes lettres verront, salut ; savoir faisons que comme nos bien aimés les bourgeois, manants et habitants de la ville de Chaalons, en obéissant à nos mandements, ayant naguère envoyé par devers nous à ce présent siège, devant nos villes et chastel de Montereau ou Faut-sur-Yonne, certain nombre d'arbalestriers, pavoiseurs , couleuvriniers, massons et charpentiers, lesquels nous ont bien et diligemment servy audict siège et y ont travaillé grandement tout ainsy que de par nous leur a esté ordonné par l'espace de sept semaines et plus, et jusque à ce que par l'ayde de
Nostre Seigneur, nostre dicte ville a esté recouvrée par assaut sur nos dicts ennemys: en quoy lesdicts Chaalonnois se sont bien et vaillamment employés chascun en son endroit, et encore chaque jour s'emploient pour le recouvrement dudict chastel, nous voulons aulcunement reconnoitre lesdicts services des susdicts envers iceux de Chaalons, afin qu'il en soit mémoire au temps à venir, et que leur compagnie ou confraierie se puisse mieux entretenir et le jeu de l'arbalète continuer entre eux , espérant qu'ils nous servent encore de leur mieux : auxdicts arbalestriers de ladicte ville de Chaalons qui sont jusques au nombre de cent dix-huit, demeurant et résidant en icelle, et à leurs successeurs arbalestriers de ladicte ville et du serment de leur compaignie ou confraierie qui seront an temps à venir, nous avons donné et octroyé, donnons et octroyons de grâce espécialle par ces présentes, congié, licence, authorité et privilège de porter dorénavant et à toujours, mais perpétuellement, en leurs robes , tuniques et jupons lesdictes couleurs que faisons à présent porter en nos livrées aux gens de nostre hostel : c'est a savoir des robes ou tuniques de drap vermeil et sur l'un des quartiers mi partie blanc et vert, avec une fleur de ne m'oubliez mie par-dessus. Et icelle livrée faire renouveler une fois ou plusieurs au long de l'an, et la porter si bon semble, quand les manderons et qu'ils viendront en nos armées : èsquelles armées quand ils viendront, voulons qu'ils soient logés en nostre quartier pour la garde de nostre personne et semblablement de nos successeurs, comme ils ont accoustumé le temps passé , sans que par aulcune personne, soit desdits seigneurs de nostre sang, nos officiers ou autres, leur soit ou puisse estre mis ou donné aulcun empeschement à cause de ladicte livrée en quelque manière que ce soit, Sy donnons en mandement par ces présentes, même à nos amis et féaux les maistres de nostre hostel au bailliage de Vermandois, et à tous nos aultres officiers et justiciers ou à leurs lieutenants, présents et à venir, et à chascun d'eux , sy comme à luy appartiendra, que de nos présentes grâces, licence et congié fassent, souffrent et laissent lesdicts arbalestriers jouir et user paisiblement, sans les aulcunement empescher ne souffir estre empeschés au contraire. En témoin de ce, nous avons fai et mettre nostre scel à ces présentes. Donné en nostre siège, devant Montereau, le xvii è jour d'octobre, l'an de grâce 1437, et de nostre règne le quinzième.
Par le roy : DIJON. (Scellé en cire jaune.)